吳卓羲機緣巧合上雲宵

被“無線”力捧,更有「新人王」稱號的吳卓羲(阿Ron),最近工作可謂非常忙碌,劇集一部接一部,每部幾乎都是擔任主角。自從劇集《衝上雲宵》播出之後,至今已經接拍多個廣告,人氣急升,難怪成為廣告界的新寵兒,又成為「奧運六星」其中之一。最近阿Ron便忙拍攝新劇《學警雄心》,劇中飾演一名學警,故他開工前刻意操Fit自己,務求出來效果可以更加理想。

對於「新人王」這個稱號,阿Ron坦言十分開心,當然要多謝大家畀面給予他這個稱號,不過,他並沒有因而產生飄飄然之感,反而令他更加繼續努力。其實,阿Ron本身是舞蹈員出身,原來他在“無線”加入舞蹈組接近三年,在一個機緣功合的情況下,可能因其外表俊朗的關係被古天樂發掘,問他有沒有興趣轉到幕前,得到前輩古天樂提拔,他覺得應該把握機會,也就因為這個機緣,令他踏上銀色旅途。

 

記---記者

羲---吳卓羲

其實,阿Ron也自覺很幸運,因他可以跟不同的前輩合作,好像吳鎮宇、劉松仁等好戲之人,大部分前輩也對他很好、教了他很多東西,因而獲益良多。或許阿Ron予人乖乖仔形象及待人有禮,所以深得一班前輩欣賞。

【圈中有三個伯樂】

記 : 圈中有乜嘢人你視佢為目標?圈中邊個係你伯樂?又有乜嘢人值得你去學習?

羲 : 好多個,好多恩人都係自己嘅目標,好似松哥 ( 劉松仁 ) 、古仔 (古天樂 ) 、同鎮宇咁,佢哋教咗我好多嘢,希望有日可以有佢哋嘅成績,呢三位前輩亦都係我嘅伯樂,好似松哥同我合作《英雄刀少年》,佢教咗我好多古裝上嘅嘢;鎮宇就教我時裝上講說話嘅技巧;古仔就係發掘我出嚟嘅人,喺私底下亦教咗我唔少嘢。我真係覺得自己好好彩,拍《衝上雲宵》之間,自己冇諗過會咁快拍到主角嘅位置,真係好多謝公司同梁家樹夠膽起用我、畀我機會。而發哥(周潤發)華仔(劉德華)就係我嘅學習對象,因為佢哋對人態度先會咁成功。

 

【與鎮宇保持聯絡】

記 : 同呢啲前輩合作有冇壓力?

羲 : 同鎮宇、松哥呢啲級數人馬演戲,初時一定會有壓力,因為你會驚自己做得唔好,怕會影響佢哋同令佢哋唔開心,當然佢哋都冇,重好用心教我演戲上嘅嘢,好鍚我,所以拍到中間嗰段時間就冇壓力。好似同鎮宇第一場對手戲係日本,當時真係好驚,因為當時鎮宇好Cool,冇同你講多幾句說話就會畀佢嚇親,不過放工之後就發覺佢原來都好玩得,大家返到香港之後重做咗朋友,直到依家我哋重Keep住聯絡,有時互相慰問近況、約吓食飯咁。

---- 2004年05月24日《成報》

 

 



Copyright © 2005 WWW.LAUCHUNGYAN.COM 刘松仁 松居 桃花岛刘松仁分站