劉松仁 喜與悲 生死決

很難想像《ICAC》裡的有型調查主任人到中年,竟會被炒魷。

也很難想像《大時代》的方進新,會跳上沙發大唱:「錢、錢、錢......」

更加難想像的是,做慣大俠Cool佬的劉松仁,會演誇張喜劇《無業樓民》。

「其實呢次劉松仁要一劇定生死!」劉松仁說。

 

【另一空間】

劉松仁的生死決顯然大獲全勝,《無業樓民》每周收視平均都超過了32點,Cool佬轉型演傻佬洪大 龍已被觀眾受落。

「所謂一劇定生死,當然唔係話呢個劇反應差,劉松仁會唔掂,而係以後冇人夠膽再搵我做呢類劇 !其實呢個係另一個空間,你明唔明?觀眾接受的話,劉松仁可以享受另一個演戲空間。」劉松仁微笑著滔滔不絕的說,不時露出眼角的魚尾 紋。

「你好似未演過咁嘅喜劇?」我問。

「唔係!」劉松仁搖搖頭:「我喺台灣拍過唔少喜劇,係香港人慣咗睇劉松仁做大俠,就冇人搵我 拍其他嘢啫!」

「呢次算唔算冒險?」

「劉松仁從來唔打無把握嘅仗!今次我係對監製有信心,我之前同王心慰已經認識,佢係一個好細心嘅女人,今次係佢發掘到劉松仁另外嘅一面,其他人做唔到!

「一個劇得唔得有太多因素,所以更加要計算,唔係話亂嚟就做到,好似劇本,演員配搭都要考慮 。比如洪天明個角色,係我要求嘅,因為個仔大啲喺溝通方面好啲,效果會好啲。

「做喜劇同做悲劇、劇情片唔同,做劇情片要養精蓄銳,等到埋位嘅時候一口氣衝;做喜劇唔同,要講求氣氛和諧,拍攝之前大家要先溝通、輕鬆啲,埋位時就有嘢出到嚟!」劉松仁說。

【享受演戲】

「好多年前,我重喺“麗的”演慣時裝,有人同我講:『喂!劉松仁,你做唔到古裝架!』點知過咗“無線”,拍《大刀王五》做譚嗣同,跟住就拍《陸小鳳》,咁就掂咗!於是喺“無線”,又有人同我講 :『你做時裝唔得架!』但係又得;後尾有人話劉松仁做唔到喜劇,結果依家又得。

「劉松仁就係咁,久唔久又得喎,所以先可以捱到今時今日,哈哈哈......」

「怕唔怕有一日唔得?」

「即係咁,今日你請飲,做主人家,好多人嚟飲,你好高興;唔通第日洪天明請飲,你做客人去飲 ,咁你就唔高興?咁樣只會令自己唔開心,會抗拒做嗰樣嘢,於是出嚟嘅效果就唔好。調轉頭你明白咗,你就會享受演戲嘅過程。」

【投入角色】

劉松仁說演戲要求「真」,所以很抗拒用「誇張」去形容在《無業樓民》的演出。

「『誇張』係貶詞,其實當你投入個角色,根本係另一個層次,你認同咗個人物行為,就冇所謂誇 唔誇,譬如有場戲講我畀雨淋、好狼狽,監製同我講拍得我好『where』,我話冇問題!因為個角色本身係咁嘅;如果個角色本身係好型嘅, 當然就唔可以『where』喇!藝術係求真嘅!你要相信嗰樣嘢,個角色先有Heart。」劉松仁皺著眉頭認真的說,隱隱然又流露出「方進新」的 嚴肅樣子。

「我拍呢個劇,有個演員令我好佩服......」劉松仁稍頓一頓:「佢叫偉樑 ( 編者按:王偉樑, 在首集飾演被劉松仁炒魷魚的小職員 ),佢係我拍戲咁多年以來所見過最認真嘅演員,甚至認真過劉松仁。佢只有三場戲,有一場戲講佢瞓喺地拉住我隻腳,佢一路拉住唔放,瞓喺地下,導演未叫Cut,佢一直唔起身!」

《喜劇之王》現實版本,大概劉松仁未有看過周星馳這齣作品吧。

【再演古裝】

最近《大時代2000》開鏡,早前曾一度傳出劉松仁有機會參演,最終都沒法成事。

「根本冇傾過!其實由頭韋家輝都冇搵過我,可能佢知我簽咗TVB啩!」劉松仁聳一聳肩。

「不覺得可惜嗎?」

「冇乜可惜,如果我去拍,你又未必睇到劉松仁做《無業樓民》,咁又可唔可惜呢?我哋做咗咁多年,唔會執著一定要做乜嘢角色或者同邊個合作,即係譬如人哋專登為你寫個劇,可能要太遷就你,太過刻意,咁反而會害咗個劇。

「曾經有人叫我再做《陸小鳳》,我冇應承,一套劇成功要太多嘢配合,唔係劉松仁肯拍就得!

沒有再演陸小鳳,劉松仁卻接拍了“無線”重拍的《倚天屠龍記》,飾演吳啟華(張無忌)的父親張翠山,與飾演殷素素的老拍檔米雪第N次合作。比起《無業樓民》似乎欠了點新鮮感?

「唔能夠咁講,即係你識咗個新女友好開心,但唔能夠話同一位三十年老朋友見面唔開心架嘛!」 劉松仁調皮的說,又露出他的招牌魚尾紋。

「其實今次簽TVB,主要原因係我想拍金庸(作品),我本身好鍾意,偏偏又未拍過,所以好想試下。」

劉松仁這次簽了“無線”三部劇,除了《倚天》,《無業樓民》,還欠一部,按“無線”慣例,收 視好的劇集少不免又要來個續集。

「唔知呢?」劉松仁微笑著說,又似有所暗示:「其實洪大龍個角色重有得去,幾好玩0架!」看來劉松仁再演失業中年漢的機會仍不少。

【後記--伍詠薇與OL】

一直聽聞劉松仁很Cool,十問九唔答。

「呢樣嘢傳媒同我自己都要負部分責任。」劉松仁說:「好似套劇宣傳,我其實都知要盡番啲責任,但係真係冇嘢好講,我又唔係伍詠薇,佢好犀利,可以即刻擺好多甫士,我就唔得!」

劉松仁沒有說錯,他在尖東海旁拍照時,就顯得頗不自在,笑容十分「矜貴」。

幸好救星出現。「劉松仁!你齣《無業樓民》,好好睇呀!」天橋下路過的兩位OL大叫起來。

「係咩?」劉松仁笑著回應,笑得魚尾紋又擠了出來。



2000年01月25日《快周刊》--- 鳴謝網友qqb提供資料


Copyright © 2005 WWW.LAUCHUNGYAN.COM 刘松仁 松居 桃花岛刘松仁分站